كتب: Ahmed T. Mahmoud
للناس اللى عايزة تتعلم أنجليزي أو أى لغة تانية، بتكلم فيه عن تجربتي الشخصية المتواضعة في تعلم الأنجليزي وبعده الإسباني، ايه أهم حاجة لاحظت أنها لازم تكون موجودة لتعلم اللغة وايه المصادر اللى اتعلمت منها، يارب تستفادوا
بعض الناس شافت البوست القديم اللى كنت منزله من فترة عن اللغات وبعتت تسأل عن أفضل طريقة لتعلم اللغة، لهذا قررت أكتب بوست وأحط فيه أهم نصائح تعلم اللغة، أو ممكن تقول أهم نصيحة في تعليم اللغة ونقاط متفرعة عنها
أهم النصائح عند بدء تعلم اللغة
النصيحة الأولى والأهم بلا منازع واللى هيتبني عليها كل النقاط الجية، هي أنك تعيش اللغة وتخليها جزء من حياتك
Live The Language !
عارف أنت الناس اللى بتعمل دايت وتخس وتمشي كويس جدًا لفترة، لكن على المدي البعيد تلاقي الدايت راح في مهب الريح ورجعوا لوزنهم قبل الدايت ويمكن أسوء ؟ الناس ده مشكلتها الأساسية أنهم أتبعوا نظام دايت معين، قعدوا مركزين عليه وهو كل حياتهم، منعوا نفسهم عن الأكل اللى بيحبوه، غصبوا نفسهم على أكل معين مش بيطقوه، ولأنهم كانوا مقتنعين أن الدايت ده مجرد فترة نستحملها وهتعدى بمجرد ما بطلوا دايت رجعوا تاني لطريقة حياتهم القديمة بكل ما فيها من أكل غير صحي ودهون وكارب وفاست فود، لهذا أخصائيين التغذية والتخسيس بينصحوا الناس اللى عايزة تخس أنها تغير طريقة حياتها 180 درجة وتختار طريقة سهلة على قلوبها لأن الطريقة ده هتكمل معاك بقية حياتك ولو ماعملتش كده هينتهي مصيرها بالفشل حتى لو نجحوا نجاح مؤقت
Skip the Diet, Change Your Lifestyle !
ايه علاقة كل الهري ده بتعلم اللغات، ببساطة نفس المشكلة بيقع فيها جزء كبير من اللى بيتعلموا اللغات، يقعد فترة طويلة ياخد كورس اربع ساعات في الأسبوع مثلًا، يخلص الكورس ويقعد شوية قدام الكتاب يحفظ شوية كلمات وشوية قواعد ويحضر أى assignment مطلوب منه وخلاص على كده ويتفاجيء بعد شهور أنه لسه مش عارف يستخدم اللغة ! نفس المشكلة اللى فوق بتتكرر هنا، أنت بتعمل مجرد نشاط لفترة معينة من الوقت، أداء واجب وتمشي، وبالتالي مستحيل تتعلم اللغة لو قعدت تعمل نفس النشاط ده لمدة 100 سنة، ده لا يقلل أبدًا من الكورسات والأماكن اللى بتدرس لغات في مصر، الكورس طبعًا هيفيدك لكن المشكلة بتبدأ لما تعتمد عليه لوحده.
طيب ايه الحل ؟ الحل مكتوب فوق عيش اللغة وخليها جزء من حياتك، مافيش كم ساعة يعدوا عليك إلا وأنت بتستخدم اللغة بطريقة أو بأخري مهما كانت ظروفك...
أنت قاعد دلوقتي على الفيس بوك ؟ يبقى غير لغة الفيس بوك للغة اللى أنت عايز تتعلمها، أنت رايح بالعربية مشوار معين ؟ يبقى حط أغاني أو دروس استماع للغة ده على فلاشة وشغلها بـ mp3 العربية، أنت قاعد بتتفرج على التلفزيون ؟ يبقى هات قنوات الأخبار باللغة اللى أنت عايز تتعلمها وحاول تفهمها، أنت قاعد دلوقتي في الشغل أو الجامعة ومش فاضي تعمل أى حاجة ؟ يبقى حط على موبايلك مسلسلات وأفلام و أغاني ودروس استماع وفي أول بريك حط الهاند فري وعيش مع نفسك، قاعد فاضي وبتتشات على الواتس؟ يبقي ضيف متحدثين أصليين للغة اللى أنت عايز تتعلمها وأتكلم معاهم في أى حاجة، ببساطة خلى اللغة جزء لا يتجزيء من حياتك وحتي لو مش بتاخد كورس هتلاقي نفسك بعد شهرين ثلاثة وصلت لمستوى كويس إن شاء الله.
طيب كويس فهمت النقطة ده وهطبقها، ايه المصادر اللى استخدامها لتعلم اللغة ؟ هحاول الخص أهم المصادر في النقاط الجاية بس افتكر كل المصادر ده هتبقى بلا قيمة لو ما اتبعتش النصيحة الأولى.
مصادر تعلم اللغات
1- الكتب الدراسية التقليدية "Textbooks"
ده أقدم طريقة معروفة لتعلم اللغات لكن حاليًا كثير من الناس مش بترتاح لها وبتفضل طرق أخري لأنها محتاجة أنك تقعد لفترة مركز وقدامك كتاب وقلم وتقعد تخطط مع نفسك وده أسوء شيء فيها في عصر السرعة اللى أحنا عايشين فيه، مع ذلك تبقي الطريقة ده مهمة في مشوارك في تعلم اللغة، أنت علشان تتعلم أى لغة محتاج أربع مهارات، القراءة، الكتابة، التحدث، الاستماع، بعض الناس بتركز فقط على أخر مهارتين لدرجة أنك ممكن تلاقي حد بيتكلم ويفهم لغة آسيوية -صينية أو يابانية مثلًا- كويس لكن يجي عند القراءة والكتابة وتلاقيه مايعرفش غير قشور ! ده طبعًا مشكلة كبيرة فلهذا الـ Textbooks هتفيدك جدًا في المواضيع اللى زى ده، ده غير أنك هتلاقي نفسك بتتطور لغويًا لما تقعد على كتاب وتركز لفترة طويلة، مع ذلك لو أنت من النوع اللى مش بيطيق الكتب الدراسية ولا عايز تستخدمها ممكن تستبدلها بكتب عادية أو طرق تانية لتعلم مهارة القراءة والكتابة، أفتكر النقطة الأولى أنت بتبني طريقة حياة علشان تخدم اللغة، حاول بقدر المستطاع ما تعملش شيء وأنت كارهه وإلا هتلاقي نفسك مش عارف تكمل بعد فترة معينة.
2- الكتب
أقل رسمية من الكتب الدراسية، لها أنواع كثيرة، نركز جدًا على نوع مهم جدًا للمبتدئين وهو أكثر كلمات وأفعال شائعة في اللغة، الكتب اللى زى ده كنز يفضل تطبعها وتذاكر منها عدد معين من الكلمات الشائعة كل يوم مع التطبيق طبعًا، مع الأسف ناس كثيرة بتضيع أغلب وقتها في حفظ الكلمات، مهما كانت الكلمات ده مش مهمة ومش بتستخدم غير قليلًا جدًا، فالنوع ده من الكتب هيوفر عليك ساعات من العناء في حفظ كلمات كثيرة لا فائدة منها.
3- الأساليب والطرق الحديثة لتعلم اللغات
وبتتمثل بطرق كثيرة منها ميشيل توماس وبول نوبل وبمسلر وفلونز وحجر رشيد "روستا ستون"، أغلب الطرق ده هتفيدك جدًا وتختصر وقت كثيرة خصوصا ميشيل توماس وبول نوبل، وكل طريقة لها مميزاتها و عيوبها وهحط في الكومنتات مختصر بسيط كنت كاتبه من سنتين عن كل طريقة بحسب تجربتي الشخصية.
4- تطبيقات الموبايل
طبعًا مش هينفع ماتستغلش شيء زى ده في عالم السمارت فونز اللى أحنا عايشين فيه، تطبيقات الموبايل مفيدة جدًا ولا غني عنها في مشوارك لتعلم اللغة، مشكلتها الوحيدة أن جزء من الناس من اللى مش بينفذوا النصيحة الأولى بيفتكر أنها كفاية لوحدها ويقعد يستخدمها لفترة طويلة لكن بلا فائدة كما هو متوقع، لكن أحنا طبعًا شغالين بالنصيحة الأولى فـ هنخليها مجرد نشاط يومي من أنشطة كثيرة بنعلمها لتعلم اللغة، أحسن تطبيق حسب تجربتي الشخصية هو "Memrise" وفيه غيره كثير زى "Beelinguapp" و "MosaLingua" و "Duolingo".
5- تطبيقات ومواقع تبادل اللغات
ده من أهم الحاجات إن لم تكن أهم حاجة هنستخدمها في مشوارنا، ببساطة أنت بتسجل في البرنامج، بتختار لغتك الأم واللغة اللى عايز تتعلمها، وتبادل اللغة مع شخص متحدث أصلي للغة اللى أنت عايز تتعلمها وعايز يتعلم لغتك الام، خلى بالك وماتنفضتش للخطوة ده لأنها ممكن تسرع تعلمك مرتين ثلاثة، أهم وأفضل تطبيق لتبادل اللغات حسب تجربتي الشخصية هو "HelloTalk" وفيه غيره كثير زى "Bilingua" "Hello Pal" "Tandem" وغيرهم كثير.
6- الميديا
وده ذكرنها في النصيحة الأولى، ببساطة أنت بتخلى كل الميديا اللى حوليك تساعدك في مشوارك في تعلم اللغة، أبحث عن أهم المواقع المخصصة لتعليم اللغة اللى عايز تتعلمها، أبحث عن قنوات يوتيوب بتدرس اللغة واشترك فيها، غير لغة كل مواقع السوشيال ميديا والموبايل للغة اللى أنت عايز تتعلمها، نزل على الرسيفر بتاعك قنوات بتتكلم اللغة اللى عايز تتعلمها، نزل أغاني ومسلسلات وأفلام والذي منه، افتكر النصيحة الأولى أنت بتبني طريقة حياة كاملة.
بس كده أنت لو عملت الكلام ده مع تطبيق النصيحة الأولى لمدة ثلاث شهور بالضبط وهتلاقي نفسك وصلت لمستوى كويس في اللغة وهتبقي خلصت مرحلة البداية اللى أصعب مرحلة في مشوارك لتعلم اللغة، فبعد مرحلة البداية هتلاقي الطريق مفتوح قدامك علشان تكمل وتوصل لمرحلة الطلاقة إن شاء الله.
بواسطة: Ahmed T. Mahmoud. من مشاراكات أعضاء مجموعة 24Seven Jobtalk Egypt - انضم للمجموعة - من هنا
